تەندروستی هەولێر ڕوونکردنەوەیەکی سه‌باره‌ت به‌ بڵاوبوونه‌وه‌ی جۆره‌ کرمێک بڵاوکردەوە

فۆتۆ:نوێ ژین میدیا

زێدان خەسرۆ_ناوەندی هەواڵ_نوێ ژین


ئەمڕۆ هەینی ۱۰ی ئایاری ۲۰۱۹ بەڕێوبەرایەتی گشتی تەندروستی هەولێر لەڕاگەیەندراوێکدا ڕایگەیاند"ماوه‌ی چه‌ند رۆژێكه‌‌ جۆره‌ كرمێك له‌ چه‌ند گه‌ڕه‌كیكی ده‌روبه‌ری شاری هه‌ولێر بڵاوبۆته‌وه‌ و نیگه‌رانی دروست كردووه، به‌ هاوڵاتیانی خۆشه‌ویست ڕاده‌گه‌یێنین كه‌ ئه‌و جۆره‌ كرمانه‌ وه‌رزین و به‌ هۆی زۆری گژوگیا ده‌رده‌كه‌ون به‌ڵام ئه‌مساڵ به‌هۆی دواكه‌تنی وه‌رزی گه‌رما و قێنكی ئاواهه‌وا ژماره‌یان‌ زیادی كردووه‌ به‌ تایبه‌تی له‌و شوێنانه‌ی كه‌ گژوگیای زۆره‌.

لەڕاگەیەندراوەکەدا هاتووە"تیمه‌كانی پاراستنی ته‌ندروستی له‌ به‌ڕێوبه‌رایه‌تیمان بۆ ڕه‌واندنه‌وه‌ی ئه‌و نیگه‌رانییه‌ سه‌ردانی گه‌ڕه‌كه‌كانی نزیك ده‌شتایی ده‌وروبه‌ری شاری هه‌ولێر ده‌كه‌ن و رێوشوێنی پێویست گیراوه‌ته‌به‌ر به وه‌رگرتنی نمونه‌ی كرمه‌كان و تێست كردنیان بۆ له‌ناوبردنیان له‌گه‌ڵ هه‌ڵمه‌تی‌ رشاندنی ده‌رمانی قڕكه‌ر بۆ ئه‌و شوێنانه‌ ده‌ست پێكراوه‌ و به‌رده‌وام ده‌بێت.

بەڕێوبەرایەتی گشتی تەندروستی هەولێر لەدرێژەی ڕاگەیەندراوەکەدا دەلێت"هاوڵاتیانی خۆشه‌ویست دڵنیا ده‌كه‌ینه‌وه‌ كه‌ ئه‌و جۆره‌ كرمانه‌ به‌شێكن له‌ خێزانی مێرووه‌كان و مه‌ترسی و زه‌ره‌رمه‌ند نین بۆ ته‌ندروستی مرۆڤ به‌ پێی به‌رزبوونه‌وه‌ی پله‌كانی گه‌رما و به‌سه‌رچوونی به‌هار ئه‌و جۆره‌ مێروانه‌ نامێنن و له‌ناوده‌چن بۆیه‌ هێچ پێویست به‌ نیگه‌رانی و دڵه‌ڕاوكێ ناكات.