بارزان خالد - ناوەندی ھەواڵ - نوێ ژین
ئاسایشی سلێمانی لە سنووری شارباژێڕ ٢٩ كەسیان بە تۆمەتی هێنان و بردنی مرۆڤ بە قاچاخ لە سنوورەكانەوە دەستگیركردووە، بە وەش ژمارەی قاچاخچیە دەستگیركراوەكان لە سنووری سلێمانی گەیشتە ٤٤ كەس.
بەپێی راگەیەندراوی ئاسایشی سلێمانی، هێزەكانیان بە هاوبەشی لەگەڵ دەزگا ئەمنی و تەندروستیەكانی سنووری قایمقامیەتی قەزای چوارتای ناوچەی شارباژێر، رۆژی چوارشەممە ٤ـی٣ـی٢٠٢٠ هەڵمەتێكی فراوانیان بۆ دەستگیركردنی ئەو كەسانەی لەسنوورەكەدا قاچاخچێتی بە هێنان و بردنی مرۆڤەوە دەكەن ئەنجامداوە.
وەك لە راگەیەندراوەکەدا هاتووە: "لە ئەنجامی ئەو هەڵمەتەدا٢٩ قاچاخچی دەستگیركراون، بەوەش كۆی گشتی قاچاخچیە دەستگیركراوەكان گەیشتە٤٤ كەس، هەموو ئەو دەستگیركراوانەش تۆمەتبارن بەوەی بە بڕێك پارە لەسنوورەكانەوە قاچاخچێتییان بە هێنان و بردنی مرۆڤەوە كردووە".
لە راگەیەندراوەكەدا ئەوەش خراوەتەڕوو، لەگەڵ دەستگیركردنی ئەو كەسانەدا، ٢٧ ئۆتۆمبێل كە بۆكاری قاچاخچێتی بەكارهێنراون دەستی بەسەردا گیراوە.
لە راگەیێندراوەکەی ئاسایشدا ئاماژە بەوەشدراوە، سەرجەم تۆمەتبارەکان دانیان بەتاوانەكەیاندا ناوە و لەبەر ئەو كارەشیان رووبەڕووی یاسا كراونەتەوە.
بەهۆی بڵاوبوونەوەی ڤایرۆسی كۆرۆنا لە ئێران، لە رۆژی٢٤ـی٢ـی٢٠٢٠ ئەنجوومەنی وەزیرانی هەرێمی كوردستان بڕیاریدا هاتووچۆی گەشتیاری لەگەڵ ئێران رابگرێت، لەو كاتەشەوە هێنان و بردنی مرۆڤ بە قاچاخ لە سنوورەكانەوە دەستیپێكردووە و رۆژی سێشەممە٣ـی٣ـی٢٠٢٠ ئاسایشی سلێمانی١٥ كەسی بەو تۆمەتە دەستگیركرد.
ليست هناك تعليقات:
إرسال تعليق