سەیران عزیز _ ناوەندی ھەواڵ _ نوێ ژین
ئەمڕۆ چوارشەممە، ئەنجومەنی وەزیرانی ھەرێمی کوردستان، بە سەرۆکایەتی مەسرور بارزانی سەرۆک وەزیران، و بە ئامادەبوونی قوباد تاڵەبانی جێگری سەرۆک وەزیران ، کۆبوونەوەی ھەفتانەی خۆی ئەنجامدا بۆ تاوتوێکردنی چەند پرسێکی گرنگ، ھەروەھا ٥ پڕۆژە یاسای گرنگی پەسەند کرد .
بەپێی راگەیاندراوێکی حکومەتی هەرێمی کوردستان، لە بڕگەی یەکەمی کۆبوونەوەکەدا، ئاوات شێخ جەناب، وەزیری دارایی و ئابووری و دارا رەشید، وەزیری پلاندان راپۆرتێکیان تایبەت بە دوا ژمارەکانی پرۆژە بودجەی هەرێمی کوردستان بۆ ساڵی ٢٠٢١ خستەڕوو.
ئەنجومەنی وەزیران بڕیاریدا لیژنەیەک پێکبهێندرێت بۆئەوەی تێبینی و پێشنیارەکانی ئەنجوومەنەکە لەناو پرۆژە یاساکە جێگیر بکرێن و دواتر ئامادە بکرێت بۆ پەسندکردنی کۆتایی ئەنجوومەنی وەزیران و دواتر رەوانەی پەرلەمان بکرێت.
لە بڕگەی دووەمی کارنامەی کۆبوونەوەکە، جێگری سەرۆکی ئەنجوومەنی وەزیران، دەرئەنجامی کۆبوونەوەی تایبەت بە رووبەڕووبوونەوەی وشکەساڵیی خستەڕوو، تێیدا وەزارەتە پەیوەندیدارەکان و پارێزگاکان و ئیدارە سەربەخۆکان پێشنیار و پلان و کاری لەپێشینەی خۆیان پێشکێش کردووە و وا بڕیارە ھە‌فتە‌ی داھاتوو پلانی سەرتاسەری بۆ رووبەڕووبوونەوەی وشكە‌ساڵی ئامادە ببێت تاوەکو لە ئەنجوومەنی وەزیران پەسندبکرێت و لە نزیکترین دەرفەتدا بکەوێتە واری جێبەجێکردن.
هەروەها ئەنجوومەنی وەزیران پێنج پرۆژە یاسای پەسندکرد کە بریتیبوون لە:
١-پرۆژە یاسای دادگەی تاوانکاریی تایبەتمەند بە تاوانەکانی داعش لە هەرێمی کوردستان - عێراق.
٢-پرۆژە یاسای بەرکارکردن و هەمواری پیادەکردنی یاسای وەبەرهێنانی پیشەسازیی هەردوو کەرتی تایبەت و تێکەڵاو ژمارە ٢٠ ی ساڵی ١٩٩٨ هەموارکراو لە هەرێمی کوردستان - عێراق.
٣-پرۆژە یاسای هەموارکردنی یاساکانی یەکێتیی ژوورەکانی بازرگانی و پیشەسازی.
٤-یاسی وەزارەتی بازرگانی و پیشەسازی.
٥-یاسای بازرگانی.
ھەروەھا بڕیار درا پرۆژە یاساکان رەوانەی پەرلەمانی کوردستان بکرێن بۆ تەشریعکردنیان .
ليست هناك تعليقات:
إرسال تعليق